ਪੰਜਾਬ ਦੇ ਰੰਗ ਵਿੱਚ ਰੰਗੀ ਅਮਰੀਕੀ Anita Lerche, ਪੰਜਾਬੀ ਸੱਭਿਆਚਾਰ ਤੇ ਸੰਗੀਤ ਨੂੰ ਬਣਾਇਆ ਆਪਣੀ ਜ਼ਿੰਦਗੀ ਦਾ ਹਿੱਸਾ

ਪੰਜਾਬ ਦੀ ਧਰਤੀ ਆਪਣੀ ਖੁੱਲ੍ਹਦਿਲੀ, ਮਹਿਮਾਨਨਿਵਾਜ਼ੀ, ਰੰਗੀਲੇ ਸੱਭਿਆਚਾਰ ਅਤੇ ਰੂਹਾਨੀ ਵਿਰਾਸਤ ਲਈ ਦੁਨੀਆ ਭਰ ਵਿੱਚ ਜਾਣੀ ਜਾਂਦੀ ਹੈ। ਇੱਥੇ ਆਉਣ ਵਾਲੇ ਬਹੁਤ ਸਾਰੇ ਲੋਕ ਪੰਜਾਬ ਦੇ ਲੋਕਾਂ ਦੇ ਮਿਲਣਸਾਰ ਸੁਭਾਅ ਅਤੇ ਇੱਥੋਂ ਦੀ ਜੀਵਨ-ਜਾਚ ਤੋਂ ਇੰਨੇ ਪ੍ਰਭਾਵਿਤ ਹੁੰਦੇ ਹਨ ਕਿ ਇਹ ਧਰਤੀ ਉਨ੍ਹਾਂ ਲਈ ਇੱਕ ਖਾਸ ਥਾਂ ਬਣ ਜਾਂਦੀ ਹੈ। ਅਮਰੀਕਾ ਦੀ ਅਨੀਤਾ ਲਿਯਾਕੇ ਇਸ ਦੀ ਇੱਕ ਦਿਲਚਸਪ ਮਿਸਾਲ ਹੈ।

ਅਮਰੀਕਾ ਦੇ ਇੰਡੀਆਨਾ ਸੂਬੇ ਦੀ ਰਾਜਧਾਨੀ ਇੰਡੀਆਨਾਪੋਲਿਸ ਨਾਲ ਸਬੰਧਤ ਅਨੀਤਾ ਸਾਲ 2005 ਵਿੱਚ ਭਾਰਤ ਆਈ ਸੀ। ਪੰਜਾਬ ਦੇ ਸੱਭਿਆਚਾਰ, ਰਹੁ-ਰੀਤਾਂ ਅਤੇ ਇੱਥੋਂ ਦੇ ਲੋਕਾਂ ਦੇ ਪਿਆਰ ਨੇ ਉਸ ਨੂੰ ਇਸ ਕਦਰ ਪ੍ਰਭਾਵਿਤ ਕੀਤਾ ਕਿ ਉਸ ਨੇ ਪੰਜਾਬ ਨੂੰ ਆਪਣਾ ਦੂਜਾ ਘਰ ਮੰਨ ਲਿਆ। ਪੰਜਾਬ ਨਾਲ ਆਪਣੇ ਗਹਿਰੇ ਲਗਾਅ ਨੂੰ ਦਰਸਾਉਂਦੇ ਹੋਏ ਅਨੀਤਾ ਨੇ ਪੰਜਾਬੀ ਪਹਿਰਾਵਾ ਅਤੇ ਭਾਸ਼ਾ ਵੀ ਅਪਣਾਈ।

ਪੰਜਾਬ ਨਾਲ ਇਹ ਰਿਸ਼ਤਾ ਸਿਰਫ਼ ਰਹਿਣ-ਸਹਿਣ ਤੱਕ ਸੀਮਤ ਨਹੀਂ ਰਿਹਾ। ਅਨੀਤਾ ਨੇ ਪੰਜਾਬੀ ਸਿੱਖੀ ਅਤੇ ਪੰਜਾਬੀ ਸੰਗੀਤ ਨੂੰ ਆਪਣੀ ਕਲਾ ਦਾ ਮਾਧਿਅਮ ਬਣਾਇਆ। ਉਸ ਨੇ ਪੰਜਾਬੀ ਗੀਤਾਂ ਦੇ ਨਾਲ-ਨਾਲ ਗੁਰਬਾਣੀ ਦੇ ਸ਼ਬਦ ਵੀ ਗਾਏ ਹਨ। ਉਸ ਦੇ ਗਾਏ ਗੀਤਾਂ ਵਿੱਚ ਪੰਜਾਬ ਪ੍ਰਤੀ ਪਿਆਰ ਅਤੇ ਇੱਥੋਂ ਦੀ ਮਿੱਟੀ ਨਾਲ ਜੁੜੇ ਜਜ਼ਬਾਤ ਸਾਫ਼ ਨਜ਼ਰ ਆਉਂਦੇ ਹਨ।

ਅਨੀਤਾ ਨੇ ‘ਸਦਕੇ ਪੰਜਾਬ ਤੋਂ ਜਿਸ ਮੋਹ ਲਈ ਮੇਰੀ ਰੂਹ’, ‘ਆਓ ਜੀ ਜੀ ਆਇਆਂ ਨੂੰ’ ਅਤੇ ‘ਬਾਈ ਗੋਡ ਮੈਂ ਬੋਰ ਹੋ ਗਈ’ ਵਰਗੇ ਗੀਤਾਂ ਰਾਹੀਂ ਪੰਜਾਬੀ ਸਰੋਤਿਆਂ ਨਾਲ ਆਪਣਾ ਨਾਤਾ ਹੋਰ ਮਜ਼ਬੂਤ ਕੀਤਾ। ਇਸ ਤੋਂ ਇਲਾਵਾ ਉਸ ਨੇ ‘ਮਿਲ ਮੇਰੇ ਪ੍ਰੀਤਮਾਂ ਜੀਓ ਤੁਧ ਬਿਨ ਖਰੀ ਨਿਮਾਣੀ’ ਸਮੇਤ ਕਈ ਸ਼ਬਦ ਵੀ ਗਾਏ ਹਨ। ਪੰਜਾਬੀ ਗਾਇਕਾਂ ਵਿੱਚੋਂ ਗੁਰਦਾਸ ਮਾਨ ਨੂੰ ਉਹ ਖਾਸ ਤੌਰ ’ਤੇ ਪਸੰਦ ਕਰਦੀ ਹੈ।