ਵੱਖਰੇ ਅੰਦਾਜ਼ ‘ਚ ਨਜ਼ਰ ਆਉਣਗੇ ਆਯੁਸ਼ਮਾਨ ਖੁਰਾਣਾ, ਕਾਮੇਡੀ ਦੇ ਨਾਲ-ਨਾਲ ਪਰਿਵਾਰਕ ਡਰਾਮਾ ‘ਚ ਪਾਉਣਗੇ ਧਮਾਲ

ਬਾਲੀਵੁੱਡ ਅਦਾਕਾਰ   ਆਯੁਸ਼ਮਾਨ ਖੁਰਾਣਾ ਆਪਣੀਆਂ ਆਉਣ ਵਾਲੀਆਂ ਦੋ ਫਿਲਮਾਂ ਨਾਲ ਇੱਕ ਵਾਰ ਫਿਰ ਵੱਖ-ਵੱਖ ਕਿਰਦਾਰਾਂ ਅਤੇ ਸ਼ੈਲੀਆਂ ਨਾਲ ਦਰਸ਼ਕਾਂ ਦੇ ਸਾਹਮਣੇ ਆਉਣ ਲਈ ਤਿਆਰ ਹਨ। ਉਨ੍ਹਾਂ ਦੀਆਂ ਅਗਲੀਆਂ ਫਿਲਮਾਂ ‘ਉਡਤਾ ਤੀਰ’ ਅਤੇ ‘ਯੇ ਪ੍ਰੇਮ ਮੋਲ ਲਿਆ’ ਦੀਆਂ ਕਹਾਣੀਆਂ ਅਤੇ ਮਾਹੌਲ ਇੱਕ-ਦੂਜੇ ਤੋਂ ਕਾਫ਼ੀ ਵੱਖਰੇ ਹਨ।ਆਕਾਸ਼ ਕੌਸ਼ਿਕ ਦੇ ਨਿਰਦੇਸ਼ਨ ਹੇਠ ਬਣ ਰਹੀ ‘ਉਡਤਾ ਤੀਰ’ ਵਿੱਚ ਆਯੁਸ਼ਮਾਨ ਖੁਰਾਨਾ ਨਾਲ ਸਾਰਾ ਅਲੀ ਖਾਨ ਨਜ਼ਰ ਆਵੇਗੀ। ਇਹ ਫਿਲਮ ਦੇਸ਼-ਭਗਤੀ ਦੇ ਪਿਛੋਕੜ ਨਾਲ ਕਾਮੇਡੀ ਅਤੇ ਜਾਸੂਸੀ ਤੱਤਾਂ ਨੂੰ ਜੋੜਦੀ ਹੈ। ਫਿਲਮ ਵਿੱਚ ਦਰਸ਼ਕਾਂ ਨੂੰ ਤੇਜ਼ ਰਫ਼ਤਾਰ ਘਟਨਾਵਾਂ ਦੇ ਨਾਲ ਹਾਸੇ-ਮਜ਼ਾਕ ਦਾ ਵੀ ਭਰਪੂਰ ਤੜਕਾ ਦੇਖਣ ਨੂੰ ਮਿਲੇਗਾ।

ਇਸ ਤੋਂ ਬਾਅਦ ਆਯੁਸ਼ਮਾਨ ‘ਯੇ ਪ੍ਰੇਮ ਮੋਲ ਲਿਆ’ ਰਾਹੀਂ ਇੱਕ ਬਿਲਕੁਲ ਵੱਖਰੇ ਮਾਹੌਲ ਵਿੱਚ ਨਜ਼ਰ ਆਉਣਗੇ। ਸੂਰਜ ਬੜਜਾਤਿਆ ਦੇ ਨਿਰਦੇਸ਼ਨ ਵਾਲੀ ਇਸ ਸੰਗੀਤਕ ਪਰਿਵਾਰਕ ਡਰਾਮਾ ਫਿਲਮ ਵਿੱਚ ਉਨ੍ਹਾਂ ਦੇ ਨਾਲ ਸ਼ਰਵਰੀ ਮੁੱਖ ਭੂਮਿਕਾ ਵਿੱਚ ਹੈ। ਫਿਲਮ ਵਿੱਚ ਪਿਆਰ, ਪਰਿਵਾਰ ਅਤੇ ਰਿਸ਼ਤਿਆਂ ਦੀਆਂ ਭਾਵਨਾਵਾਂ ਨੂੰ ਕੇਂਦਰ ਵਿੱਚ ਰੱਖਿਆ ਗਿਆ ਹੈ। ਹਿਮੇਸ਼ ਰੇਸ਼ਮੀਆ ਇਸ ਫਿਲਮ ਲਈ ਸੰਗੀਤ ਦੇ ਰਹੇ ਹਨ।

ਆਯੁਸ਼ਮਾਨ ਖੁਰਾਨਾ ਦਾ ਕਹਿਣਾ ਹੈ ਕਿ ਉਹ ਆਪਣੇ ਕਰੀਅਰ ਵਿੱਚ ਕਿਸੇ ਇੱਕ ਤਰ੍ਹਾਂ ਦੇ ਕਿਰਦਾਰ ਜਾਂ ਜੌਨਰ ਤੱਕ ਸੀਮਤ ਨਹੀਂ ਰਹਿਣਾ ਚਾਹੁੰਦੇ। ਉਨ੍ਹਾਂ ਲਈ ਹਰ ਨਵੀਂ ਫਿਲਮ ਇੱਕ ਨਵਾਂ ਤਜਰਬਾ ਹੁੰਦੀ ਹੈ, ਜਿਸ ਰਾਹੀਂ ਉਹ ਆਪਣੇ ਅਦਾਕਾਰੀ ਦੇ ਵੱਖਰੇ ਪੱਖ ਦਰਸ਼ਕਾਂ ਸਾਹਮਣੇ ਲਿਆਉਣਾ ਚਾਹੁੰਦੇ ਹਨ। ਅਦਾਕਾਰ ਮੁਤਾਬਕ ‘ਉਡਤਾ ਤੀਰ’ ਵਿੱਚ ਉਨ੍ਹਾਂ ਨੂੰ ਦੇਸ਼-ਭਗਤੀ ਅਤੇ ਕਾਮੇਡੀ ਦੇ ਮਿਲੇ-ਜੁਲੇ ਅੰਦਾਜ਼ ਨੂੰ ਅਜ਼ਮਾਉਣ ਦਾ ਮੌਕਾ ਮਿਲਿਆ ਹੈ, ਜਦਕਿ ‘ਯੇ ਪ੍ਰੇਮ ਮੋਲ ਲਿਆ’ ਉਨ੍ਹਾਂ ਨੂੰ ਭਾਵਨਾਤਮਕ ਅਤੇ ਪਰਿਵਾਰਕ ਕਹਾਣੀ ਦਾ ਹਿੱਸਾ ਬਣਨ ਦਾ ਮੌਕਾ ਦਿੰਦੀ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਵੱਖ-ਵੱਖ ਕਿਰਦਾਰ ਨਿਭਾਉਣ ਦਾ ਮਕਸਦ ਸਿਰਫ਼ ਜੌਨਰ ਬਦਲਣਾ ਨਹੀਂ, ਸਗੋਂ ਹਰ ਕਿਰਦਾਰ ਦੀ ਆਪਣੀ ਕਹਾਣੀ ਅਤੇ ਭਾਵਨਾ ਨੂੰ ਸਹੀ ਢੰਗ ਨਾਲ ਪਰਦੇ ’ਤੇ ਪੇਸ਼ ਕਰਨਾ ਹੈ।

View this post on Instagram

A post shared by Dharma Productions (@dharmamovies)

ਆਯੁਸ਼ਮਾਨ ਦੀ ਫਿਲਮ ਚੋਣ ਵਿੱਚ ਇਹ ਵਿਭਿੰਨਤਾ ਉਨ੍ਹਾਂ ਦੇ ਕਰੀਅਰ ਦਾ ਇੱਕ ਮਹੱਤਵਪੂਰਨ ਹਿੱਸਾ ਰਹੀ ਹੈ। ਸਮਾਜਿਕ ਮੁੱਦਿਆਂ ’ਤੇ ਆਧਾਰਿਤ ਕਾਮੇਡੀ ਤੋਂ ਲੈ ਕੇ ਰੋਮਾਂਸ, ਡਰਾਮਾ ਅਤੇ ਹੋਰ ਵੱਖਰੀਆਂ ਸ਼ੈਲੀਆਂ ਤੱਕ, ਉਹ ਲਗਾਤਾਰ ਨਵੇਂ ਤਜਰਬੇ ਕਰਦੇ ਰਹੇ ਹਨ। ਹੁਣ ‘ਉਡਤਾ ਤੀਰ’ ਅਤੇ ‘ਯੇ ਪ੍ਰੇਮ ਮੋਲ ਲਿਆ’ ਰਾਹੀਂ ਉਨ੍ਹਾਂ ਦਾ ਇਹ ਵੱਖਰਾ ਸਿਨੇਮਾਈ ਸਫ਼ਰ ਹੋਰ ਅੱਗੇ ਵਧਦਾ ਨਜ਼ਰ ਆਵੇਗਾ।

- GTC Pollywood